Home top stories ಬ್ಯಾಂಕ್ ಉದ್ಯೋಗಿಗಳು ನಿಜಕ್ಕೂ ಸುಖಿಗಳೇ?

ಬ್ಯಾಂಕ್ ಉದ್ಯೋಗಿಗಳು ನಿಜಕ್ಕೂ ಸುಖಿಗಳೇ?

SHARE
ಈ ಲೇಖನ ಸರಣಿಯ ಭಾಗ 3 ಹಾಗೂ 4ರಲ್ಲಿ ನೋಟು ಅಪಮೌಲ್ಯೀಕರಣದ ನಂತರ ಬ್ಯಾಂಕ್ ಉದ್ಯೋಗಗಳು ಶ್ರಮ ಹಾಗೂ ಕೆಲಸದ ಕುರಿತು ಬರೆಯಲಾಗಿದ್ದು, ಇದಕ್ಕೆ ಬಂದ ಪ್ರತಿಕ್ರಿಯೆಗಳಿಗೆ, ಮರು ಪ್ರತಿಕ್ರಿಯೆಯನ್ನೂ ನೀಡಲಾಯಿತು. ನೋಟು ಅಪಮೌಲ್ಯೀಕರಣದ ನಂತರ ಬ್ಯಾಂಕ್ ಸಿಬ್ಬಂದಿಗಳಿಗೆ ಹೆಚ್ಚಿದ ಕಾರ್ಯದೊತ್ತಡ ಒಂದೆಡೆಯಾದರೆ, ಸಾಮಾನ್ಯ ದಿನಗಳಲ್ಲಿ ಬ್ಯಾಂಕ್ ಸಿಬ್ಬಂದಿಗಳ ಸುಖ ದುಃಖಗಳ ಕುರಿತು ಸಾಮಾನ್ಯ ಜನರಿಗೆ ಹೆಚ್ಚಾಗಿ ತಿಳಿದಿಲ್ಲ ಎನ್ನುವುದು ವಾಸ್ತವ.
ನ.೮ಕ್ಕಿಂತಲೂ ಮುನ್ನ ಹಾಗೂ ನೋಟು ನಿಷೇಧದಿಂದ ಉಂಟಾದ ಸಮಸ್ಯೆ ಬಹುತೇಕ ಸರಿದಾರಿಗೆ ಬಂದಿರುವ ಈ ವೇಳೆಯ ನಂತರ ಅಂದರೆ, ಸಾಮಾನ್ಯ ದಿನಗಳಲ್ಲಿ ಬ್ಯಾಂಕ್ ಉದ್ಯೋಗಿಗಳು ನಿಜಕ್ಕೂ ಶ್ರಮದಾಯಕ ಕೆಲಸ ಮಾಡುತ್ತಾರೆ ಎನ್ನುವುದು ಹೆಚ್ಚಿನ ಮಂದಿಗೆ ತಿಳಿದಿಲ್ಲ.
ಬ್ಯಾಂಕ್ ಉದ್ಯೋಗಿಗಳ ಕುರಿತಾಗಿ ಬಹುತೇಕ ಮಂದಿಯಲ್ಲಿ ಒಂದು ರೀತಿಯ ಭಾವನೆಯಿರುತ್ತದೆ. ಬ್ಯಾಂಕ್ ಉದ್ಯೋಗಿಗಳೇನು ಆರಾಮವಾಗಿ ಎಸಿ ಕೆಳಗೋ, ಫ್ಯಾನ್ ಕೆಳಗೋ ಕುಳಿತು ಕೆಲಸ ಮಾಡುತ್ತಾರೆ. ಕ್ಲರ್ಕ್ ಆಗಿ ಕೆಲಸ ಮಾಡುವವರಿಗೇ ಬಹಳಷ್ಟು ವೇತನ ನೀಡುತ್ತಾರೆ. ಉದ್ಯೋಗಿಗಳಿಗೆ ವೇತನದ ಜೊತೆಯಲ್ಲಿ ಭತ್ಯೆ, ಮನೆ ಬಾಡಿಗೆ, ಆರೋಗ್ಯ ವಿಮೆ, ವರ್ಷಕ್ಕೊಮ್ಮೆ ಪ್ರವಾಸ ಹೀಗೆ ಸಾಕಷ್ಟು ಫೆಸಿಲಿಟಿ ನೀಡಿರುತ್ತಾರೆ. ಅವರಿಗೇನು ಕಮ್ಮಿ, ಸುಖೀ ಜೀವನ ನಡೆಸುತ್ತಾರೆ ಎಂಬುದಷ್ಟೇ ತಿಳಿದಿರುತ್ತದೆ.
ಆದರೆ, ಈ ಎಲ್ಲಾ ಫೆಸಿಲಿಟಿಯನ್ನು ಬ್ಯಾಂಕ್ ಉದ್ಯೋಗಿಗಳಿಗೆ ಏತಕ್ಕಾಗಿ ನೀಡಲಾಗಿರುತ್ತದೆ, ಅದರ ಹಿಂದೆ ಅವರಿಗಿರುವ ರಿಸ್ಕ್ ಎಂತಹದ್ದು ಎಂಬುದರ ಕುರಿತು ಯಾರೂ ಚಿಂತಿಸುವ ಗೋಜಿಗೆ ಹೋಗುವುದಿಲ್ಲ. ಒಂದು ವ್ಯವಸ್ಥೆಯ ಒಳಗೆ ಕೆಲಸ ನಿರ್ವಹಿಸುವ ಓರ್ವ ಸಿಬ್ಬಂದಿಗೆ ಹೆಚ್ಚಿನ ವೇತನ ಹಾಗೂ ಭತ್ಯೆ ನೀಡಲಾಗಿರುತ್ತದೆ ಎಂದರೆ ಅದರ ಹಿಂದೆ ಆ ಸಿಬ್ಬಂದಿಗೆ ಹೆಚ್ಚಿನ ಜವಾಬ್ದಾರಿಯಿರುತ್ತದೆ ಎಂದರ್ಥ.
ಇಲ್ಲಿ ಬ್ಯಾಂಕ್ ಕರ್ಕ್‌ಗೆ ನೀಡಲಾಗುವ ಆರಂಭಿವ ವೇತನ ಅಂದಾಜು ೨೦ ರಿಂದ ೩೦ ಸಾವಿರ, ಜೊತೆಯಲ್ಲಿ ಕಾಲಕಾಲಕ್ಕೆ ಡಿಎ, ಸ್ಪೆಶಲ್ ಅಲೋಯನ್ಸ್, ಎಚ್‌ಆರ್‌ಎ ಹಾಗೂ ಆರೋಗ್ಯ ವಿಮೆ , ಅದೇ ರೀತಿ, ಪ್ರೊಬೆಷನರಿ ಆಫಿಸರ್ ಆಗಿ ಕಾರ್ಯ ನಿರ್ವಹಿಸುವ ವ್ಯಕ್ತಿಗೆ ಆರಂಭಿಕ ವೇತನ ಅಂದಾಜು ೨೫ರಿಂದ ೪೨ ಸಾವಿರ, ಜೊತೆಯಲ್ಲಿ ಕಾಲಕಾಲಕ್ಕೆ ಡಿಎ, ಸ್ಪೆಶಲ್ ಅಲೋಯನ್ಸ್, ಎಚ್‌ಆರ್‌ಎ ಹಾಗೂ ಆರೋಗ್ಯ ವಿಮೆ ಸೇರಿದಂತೆ ಹಲವು ಫೆಸಿಲಿಟಿ ನೀಡಲಾಗಿರುತ್ತದೆ.
ಇನ್ನು ರೈಲ್ವೆ ಇಲಾಖೆಯಲ್ಲಿ ಕಮರ್ಷಿಯಲ್ ಕ್ಲರ್ಕ್ ಆಗಿ  ಕಾರ್ಯ ನಿರ್ವಹಿಸುವ ಸಿಬ್ಬಂದಿಗೆ  ಅಂದಾಜು ೩೪ ಸಾವಿರ ಆರಂಭಿಕ ವೇತನ, ಇಂಜಿನ್ ಡ್ರೈವರ್ ಅಂದರೆ ಲೊಕೋ ಪೈಲಟ್‌ಗೆ ೩೪ ಸಾವಿರ ವೇತನ ಹಾಗೂ ಭತ್ಯೆ, ಚೀಫ್ ಟಿಕೆಟ್ ಇನ್ಸ್‌ಪೆಕ್ಟರ್‌ಗೆ ಅಂದಾಜು ೩೪ ಸಾವಿರ ವೇತನ ಹಾಗೂ ಭತ್ಯೆ ನೀಡಲಾಗುತ್ತದೆ.
ರೈಲ್ವೆ ಇಲಾಖೆಯಲ್ಲಿ ಟಿಕೆಟ್ ಕೌಂಟರ್‌ನಲ್ಲಿ ಕಾರ್ಯ ನಿರ್ವಹಿಸುವ ಓರ್ವ ಸಿಬ್ಬಂದಿಗೂ ಬ್ಯಾಂಕ್‌ನಲ್ಲಿ ಕ್ಲರ್ಕ್ ಆಗಿ ಕಾರ್ಯ ನಿರ್ವಹಿಸುವ ಸಿಬ್ಬಂದಿಗೂ ಸರಳ ರೀತಿಯಲ್ಲಿ ಹೋಲಿಕೆ ಮಾಡಿ ನೋಡಿದಾಗ… ಟಿಕೆಟ್ ಕೌಂಟರ್‌ನಲ್ಲಿ ಕೆಲಸ ನಿರ್ವಹಿಸುವ ಸಿಬ್ಬಂದಿ ತಮ್ಮ ಸಮಯ ಆದ ತಕ್ಷಣ ಯಾವುದೇ ಮುಲಾಜಿಲ್ಲದೇ ಇದ್ದು ಹೋಗುವುದು ಸಾಮಾನ್ಯ ಸಂಗತಿ. ಆದರೆ, ಅದೇ ಮಟ್ಟಿನ ವೇತನ ಪಡೆಯುವ ಬ್ಯಾಂಕ್ ಸಿಬ್ಬಂದಿ ಎಷ್ಟೇ ತಡವಾದರೂ ತನ್ನೆಲ್ಲಾ ಜವಾಬ್ದಾರಿಗಳನ್ನು ನಿರ್ವಹಿಸಿ, ವರದಿ ನೀಡಿ ತೆರಳಬೇಕು. ಇನ್ನು, ನ.೮ರ ನಂತರ ಬ್ಯಾಂಕ್ ಸಿಬ್ಬಂದಿಗಳ ಪಾಡು ನೋಡುವುದಾದರೆ, ಹಿಂದಿನ ಲೇಖನದಲ್ಲೇ ಉಲ್ಲೇಖಿಸಿದ ಹಾಗೆ ತಡರಾತ್ರಿಯವರೆಗೂ ಕೆಲಸ ನಿರ್ವಹಿಸಿದ್ದಾರೆ. ಸಾಮಾನ್ಯವಾಗಿ ಬ್ಯಾಂಕ್ ವ್ಯವಹಾರ ಸಾರ್ವಜನಿಕರಿಗೆ ೪.೩೦ಕ್ಕೆ ಮುಕ್ತಾಯವಾಗುತ್ತದೆ. ಹೀಗಾಗಿ, ೪.೩೦ಕ್ಕೆ ಬ್ಯಾಂಕ್ ಸಿಬ್ಬಂದಿಗಳ ಕೆಲಸ ಮುಕ್ತಾಯವಾಗಿತು. ಎಷ್ಟು ಬೇಗ ಹೊರಡುತ್ತಾರೆ ಎಂಬ ಭಾವನೆ ಮೂಡುತ್ತದೆ.
ಆದರೆ, ೪.೩೦ರ ನಂತರವೇ ಅವರ ಕೆಲಸದ ಮತ್ತೊಂದು ಆಯಾಮ ಆರಂಭವಾಗುವುದು. ಅಂದಂದಿನ ವ್ಯವಹಾರವನ್ನು ಸಂಪೂರ್ಣ ದಾಖಲಿಸಿ, ಹಣ ಸ್ವೀಕೃತಿ ಹಾಗೂ ಪಾವತಿಯ ಸಂಪೂರ್ಣ ದಾಖಲಾತಿ ಹಾಗೂ ವ್ಯವಹಾರದ ಹಣ ಹೊಂದಾಣಿ(ಟ್ಯಾಲಿ) ಆಗಬೇಕಿರುತ್ತದೆ. ಈ ವಿಚಾರದಲ್ಲಿ ದಾಖಲೆ ಹಾಗೂ ಇರುವ ನಗದು ಹಣ ಎರಡಕ್ಕೂ ಹೊಂದಾಣಿಕೆಯಾಗಬೇಕು. ಇದರಲ್ಲಿ ಒಂದು ರೂ. ವ್ಯತ್ಯಾಸ ಬಂದರೂ ಅಂದಿನ ದಿನವನ್ನು(ಡೇ ಎಂಡ್) ಮುಕ್ತಾಯಗೊಳಿಸುವಂತಿಲ್ಲ. ಇಂತಹ ಸಮಸ್ಯೆ ಸೃಷ್ಠಿಯಾಗದೇ ಇರಲು ಬ್ಯಾಂಕ್ ಸಿಬ್ಬಂದಿ ವ್ಯವಹಾರದ ಸಮಯದಲ್ಲಿ ಮೈಯೆಲ್ಲಾ ಕಣ್ಣಾಗಿ ಕೆಲಸ ಮಾಡಬೇಕಿರುವ ಜವಾಬ್ದಾರಿ ಇರುತ್ತದೆ.
ಬ್ಯಾಂಕ್ ಸಿಬ್ಬಂದಿಗಳ ಅತ್ಯಂತ ಅಪಾಯದ ಕೆಲಸವೆಂದರೆ ಸಾಲ ಮಂಜೂರು ಮಾಡುವುದು. ಯಾವನೋ ಓರ್ವ ಗ್ರಾಹಕ ಸಾಲ ತೆಗೆದುಕೊಳ್ಳಲು ತನ್ನ ಮನೆ ಅಥವಾ  ನಿವೇಶನವನ್ನು ಅಡವಿಡಬೇಕಿರುತ್ತದೆ ಎಂದುಕೊಳ್ಳಿ. ಗ್ರಾಹಕ ತಾನು ಅಡವಿಡುವ ನಿವೇಶನ, ಮನೆಯ ಕುರಿತಾದ ದಾಖಲಾತಿ ಪತ್ರವನ್ನು ಬ್ಯಾಂಕ್‌ಗೆ ಸಲ್ಲಿಸಬೇಕಿರುತ್ತದೆ. ಈತನಿಗೆ ಸಾಲ ಮಂಜೂರು ಮಾಡುವ ಮುನ್ನ ಇದಕ್ಕಾಗಿ ಬ್ಯಾಂಕ್‌ನಲ್ಲಿ ನೇಮಕವಾದ ಸಿಬ್ಬಂದಿಯೊಬ್ಬರು ಅಡವಿಡುವ ಸ್ಥಳವನ್ನು ಖುದ್ದು ಪರೀಕ್ಷಿಸಬೇಕಿರುತ್ತದೆ. ದಾಖಲೆ ಪತ್ರ ಹಾಗೂ ಆಸ್ತಿ ಎರಡೂ ಹೊಂದಾಣಿಕೆಯಾದರೆ ಮಾತ್ರ ಸಾಲ ಮಂಜೂರಾಗುತ್ತದೆ. ಇಂತಹ ಸಂದರ್ಭದಲ್ಲಿ ಸಾಲ ತೆಗೆದುಕೊಳ್ಳುವ ಗ್ರಾಹಕರಲ್ಲಿ ಕೆಲವೊಬ್ಬರು ಯಾವುದೋ ದಾಖಲೆ, ಇನ್ನಾವುದೇ ನಿವೇಶನ ತೋರಿಸಿ ಸಾಲ ಮಂಜೂರು ಮಾಡಿಕೊಂಡ ಉದಾಹರಣೆಯಿದೆ. ಇಂತಹ ವೇಳೆಯಲ್ಲಿ ಅಲ್ಲಿನ ಕ್ರಡಿಟ್ ಆಫಿಸರ್ ಇದಕ್ಕೆ ಹೊಣೆಗಾರರಾಗುತ್ತಾರೆ. ಇಂತಹ ಪ್ರಕರಣಗಳು ಈಗಾಗಲೇ ಸಾಕಷ್ಟು ನಡೆದಿದ್ದು, ಎಷ್ಟೋ ಬ್ಯಾಂಕ್ ಸಿಬ್ಬಂದಿಗಳ ಆತ್ಮಹತ್ಯೆಗೆ ಶರಣಾಗಿದ್ದಾರೆ.
ಇಲ್ಲಿ ಹೇಳ ಹೊರಟಿರುವುದು, ಇಂತಹ ಸಾಲ ಮಂಜೂರು ಮಾಡುವ ಮುನ್ನ ಅಲ್ಲಿನ ಸಿಬ್ಬಂದಿ ಹೊಂದಿರುವ ಗುರುತರ ಜವಾಬ್ದಾರಿಯ ಕುರಿತು. ಸಿಬ್ಬಂದಿ ಎಷ್ಟೇ ಎಚ್ಚರಿಕೆಯಿಂದ ಇದ್ದರೂ ವಂಚಿಸುವ ಗ್ರಾಹಕರು ಇರುತ್ತಾರೆ.
ಇಲ್ಲಿ ಮೇಲೆ ಹೇಳಿರುವುದು ಬ್ಯಾಂಕ್ ಸಿಬ್ಬಂದಿಗಳು ಹೊಂದಿರುವ ಜವಾಬ್ದಾರಿ ಹಾಗೂ ರಿಸ್ಸ್‌ನ ಕೆಲವು ಉದಾಹರಣೆ ಮಾತ್ರ. ಇದರ ಹೊರತಾಗಿ ಹಲವಾರು ಗುರುತರ ಜವಾಬ್ದಾರಿಯನ್ನು ಹೊಂದಿರುವ ಬ್ಯಾಂಕ್ ಸಿಬ್ಬಂದಿ, ತಮ್ಮ ವೇತನ ಹೆಚ್ಚಳ ಮಾಡಬೇಕು ಎಂದು ಕೇಳುವುದು ಒಂದು ರೀತಿಯಲ್ಲಿ ಸಮಂಜಸವೇ ಆಗಿದೆ. ಮೇಲೆ ಹೇಳಿದ ರಿಸ್ಕ್‌ಗಳನ್ನು ಒಮ್ಮೆ ಕಣ್ಣಾರೆ ಕಂಡರೆ, ಬ್ಯಾಂಕ್ ಸಿಬ್ಬಂದಿಗಳು ನಿಜಕ್ಕೂ ಸುಖಿಗಳೇ ಎಂಬ ಪ್ರಶ್ನೆ ಮೂಡುತ್ತದೆ.
ಬ್ಯಾಂಕ್ ಸಿಬ್ಬಂದಿಗಳು ಹೊಂದಿರುವ ಜವಾಬ್ದಾರಿ ಎಂತಹದ್ದು ಎಂದು ಅವರನ್ನು ಶ್ಲಾಘಿಸುವ ಜೊತೆಯಲ್ಲೇ, ಇವರಲ್ಲಿನ ಕೆಲವ ವಂಚಕರ ಕುರಿತೂ ಚಿಂತಿಸಬೇಕು. ಎಷ್ಟೋ ಪ್ರಕರಣಗಳಲ್ಲಿ ಸಾಲ ಮಂಜೂರು ಮಾಡಿಕೊಟ್ಟರೆ ಇಂತಿಷ್ಟು ಹಣ ನೀಡಬೇಕು ಎಂದು ಗ್ರಾಹಕರನ್ನು ಸುಲಿಗೆ ಮಾಡುವ ಸಿಬ್ಬಂದಿ ಅಥವಾ ವ್ಯವಸ್ಥಾಪಕರೂ ಸಹ ಈ ವ್ಯವಸ್ಥೆಯೊಳಗಿದ್ದಾರೆ. ಆದರೆ, ಇವರ ಸಂಖ್ಯೆ ಕಡಿಮೆ. ಇನ್ನು, ತಾವು ಬ್ಯಾಂಕ್ ನೌಕರರು ಎಂಬ ಅಹಂನಿಂದ ಗ್ರಾಹಕರೊಂದಿಗೆ ದುರ್ವರ್ತನೆ ತೋರುವ ಹಾಗೂ ದುರಹಂಕಾರದಿಂದ ಮಾತನಾಡುವ, ವ್ಯವಹರಿಸುವ ಸಿಬ್ಬಂದಿ ಬಹಳಷ್ಟಿದ್ದಾರೆ. ಇಂತಹ ವರ್ತನೆಗಳು ಬದಲಾಗಬೇಕು.
ಬ್ಯಾಂಕ್‌ಗಳು ಸಾರ್ವಜನಿಕರಿಗೆ ಎಷ್ಟು ಅಗತ್ಯವೋ, ಬ್ಯಾಂಕ್‌ಗಳಿಗೂ ಗ್ರಾಹಕರು ಅಷ್ಟೇ ಅಗತ್ಯ. ಗ್ರಾಹಕರಿಲ್ಲದೇ ಹೋದರೆ ಯಾವುದೇ ಬ್ಯಾಂಕ್ ನಡೆಯಲು ಸಾಧ್ಯವಿಲ್ಲ. ಹೀಗಾಗಿ, ಬ್ಯಾಂಕ್ ಸಿಬ್ಬಂದಿಗಳು ಗ್ರಾಹಕ ಸ್ನೇಹಿಯಾಗಿ ಕಾರ್ಯ ನಿರ್ವಹಿಸುವತ್ತಲೂ ಸಹ ಗಮನ ಹರಿಸಬೇಕು.
*ಲಕ್ಷಾಂತರ, ಕೊಟ್ಯಂತರ ರೂ.ಗಳನ್ನು ಬ್ಯಾಂಕ್‌ನಲ್ಲಿಟ್ಟುಕೊಂಡ ಸಿಬ್ಬಂದಿ ಒಂದು ರೀತಿಯಲ್ಲಿ ತಮ್ಮ ಜೀವವನ್ನೇ ಪಣಕ್ಕಿಟ್ಟಿರುತ್ತಾರೆ ಎಂದರೆ ತಪ್ಪಲ್ಲ.
*ಎಟಿಎಂಗಳಿಗೆ ಹಣ ತುಂಬಿಸುವ ಜವಾಬ್ದಾರಿ ಹೊತ್ತ ಸಿಬ್ಬಂದಿಯ ರಿಸ್ಕ್‌ನ್ನು ಒಮ್ಮೆ ಚಿಂತಿಸಿ.
*ತಡರಾತ್ರಿಯವರೆಗೂ ಕಾರ್ಯ ನಿರ್ವಹಿಸುವ ವೇಳೆ ಯಾರಾದರೂ ದಾಳಿ ನಡೆಸಿದರೆ ಸಿಬ್ಬಂದಿಗಳ ಪರಿಸ್ಥಿತಿಯನ್ನು ಒಮ್ಮೆ ಕಲ್ಪಿಸಿಕೊಳ್ಳಿ.
*ನಾವು ನಮ್ಮ ಮನೆಗಳಲ್ಲಿ ಒಂದು ಲಕ್ಷದಷ್ಟು ಹಣ ಇಟ್ಟುಕೊಳ್ಳಲೇ ಚಿಂತಿಸುತ್ತೇವೆ. ರಿಸ್ಕ್ ಏಕೆ ಎಂದು ಬ್ಯಾಂಕ್‌ನಲ್ಲಿ ಇಡುತ್ತೇವೆ. ಆದರೆ, ಸಾರ್ವಜನಿಕರ ಲಕ್ಷಾಂತರ, ಕೊಟ್ಯಂತರ ಹಣವನ್ನು ತಮ್ಮಲ್ಲಿಟ್ಟುಕೊಂಡು ಅದರ ರಿಸ್ಕ್ ತೆಗೆದುಕೊಳ್ಳುವ ಬ್ಯಾಂಕ್ ಸಿಬ್ಬಂದಿ ನಿಜಕ್ಕೂ ಶ್ಲಾಘನಾರ್ಹರು ಅಲ್ಲವೇ.
ನಾಳಿನ ಸಂಚಿಕೆಯಲ್ಲಿ…
*ಮೇರೆ ಪ್ಯಾರಿ ದೇಶವಾಸಿಯೋ ಹಾಗೂ ಡಿಜಿಟಲ್ ವ್ಯವಹಾರ
Facebook Comments
SHARE
Previousಅಪ್ಪ-ಮಗನ ಕಿತ್ತಾಟ: ಸೈಕಲ್ ಚಿಹ್ನೆಗಾಗಿ ಜಗ್ಗಾಟ
Nextಮೇರೆ ಪ್ಯಾರಿ ದೇಶವಾಸಿಯೋ ಹಾಗೂ ಡಿಜಿ ಭಾರತ್
ಎಸ್.ಆರ್. ಅನಿರುದ್ಧ ವಸಿಷ್ಠ ಚಿತ್ರದುರ್ಗ ಜಿಲ್ಲೆಯ ಚಳ್ಳಕೆರೆ ಮೂಲ. ಸದ್ಯ ನೆಲೆಸಿರುವುದು ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯಲ್ಲಿ . ಪತ್ರಿಕೋದ್ಯಮ ವಿಷಯದಲ್ಲಿ ರಾಷ್ಟ್ರಮಟ್ಟದಲ್ಲಿ ಭಾರತೀಯ ವಿದ್ಯಾಭವನದಿಂದ ಎರಡು ಸ್ವರ್ಣ, ಒಂದು ರಜತ ಪದಕ ಪಡೆದುಕೊಂಡಿದ್ದೇನೆ. ಶಿವಮೊಗ್ಗದ ಸ್ಪಂದನ ವಾಹಿನಿಯಲ್ಲಿ ಸುದ್ದಿ ಸಂಪಾದಕನಾಗಿ ಕಾರ್ಯನಿರ್ವಹಿಸಿದ್ದೇನೆ. ಪ್ರಸ್ತುತ ಶಿವಮೊಗ್ಗದ ಮಲೆನಾಡು ಮಿತ್ರ ಜಿಲ್ಲಾಮಟ್ಟದ ಪತ್ರಿಕೆಯಲ್ಲಿ ಕಾರ್ಯನಿರ್ವಾಹಕ ಸಂಪಾದಕನಾಗಿದ್ದೇನೆ. ರಾಜಕೀಯ, ಸಾರ್ವಜನಿಕ ಆಡಳಿತ ವಿಷಯಗಳು ಫೇವರೇಟ್. ಯುಪಿಎಸ್‌ಸಿ ಪರೀಕ್ಷೆಯನ್ನು ಎದುರಿಸಿದ್ದೇನೆ. ಅಂತರ್ಜಾಲದಲ್ಲಿ ಹುಡುಕಾಟ,ಸಮಕಾಲೀನ ವಿದ್ಯಮಾನಗಳಿಗೆ ಪ್ರತಿಕ್ರಿಯೆ ನೀಡುವುದು ಇಷ್ಟದ ಕಾರ್ಯ. ಫೈಟ್ ಫಾರ್ ರೈಟ್, ನಿಲುಮೆ ಇನ್ನಿತರ ತಾಣಗಳಲ್ಲಿ ಲೇಖನಗಳು ಬೆಳಕು ಕಂಡಿವೆ. ಸಾಮಾಜಿಕ ಜಾಲತಾಣಗಳಲ್ಲಿನ ಕಿರು ಚರ್ಚೆಯನ್ನು ಗಮನಿಸುತ್ತೇನೆ. ಸುದ್ದಿಯನ್ನು ಸುದ್ದಿಯಂತೆಯೂ ನೋಡುವುದು. ಅದರ ಹಿಂದಿರುವ ವಿಚಾರಗಳನ್ನು ವಿಮರ್ಶಿಸುವ ಗುಣ ನನ್ನದು . ಪಕ್ಷಾತೀತವಾಗಿ, ಯಾವುದೇ ಸಿದ್ಧಾಂತಕ್ಕೂ ಜೋತುಬೀಳದಂತಹ ಶುದ್ಧ ಪತ್ರಿಕೋದ್ಯಮ ನಡೆಸಬೇಕು ಎಂಬುದು ನನ್ನ ಆಶಯ. ಓರ್ವನ ಸಾಮರ್ಥ್ಯಕ್ಕಿಂತ, ಸಾಂಘಿಕ ಸಾಮರ್ಥ್ಯ ಹಿರಿಯದು ಎನ್ನುವ ತತ್ವದಲ್ಲಿ ನಂಬಿಕೆಯುಳ್ಳವನು. ಆತ್ಮರತಿ ಎಂದಿಗೂ ಇಲ್ಲ. ಆದರೆ ಮಾಡಿದ ಕಾರ್ಯಕ್ಕೆ ತಕ್ಕ ಐಡೆಂಟಿಟಿ ದೊರೆಯುವವರೆಗೂ ಬಿಡುವುದಿಲ್ಲ. ಮೂಢನಂಬಿಕೆ ವಿರೋಧಿ ಆದರೆ, ದೈವಭೀರು. ಡೋಂಗಿ ಸ್ವಾಮೀಜಿಗಳನ್ನು ಕಂಡರೆ ಆಗದು. ಇವಿಷ್ಟು ಸಾಕಲ್ಲವಾ ನನ್ನ ಬಗ್ಗೆ?

LEAVE A REPLY

− one = two